Art is My Life: ဖားပုံပြင်

Sunday, February 25, 2007

ဖားပုံပြင်

တစ်ခါတုန်းက ရေအိုင်တစ်ခု တွင်ဖားနှစ်ကောင် ရှိကြသည်။ သူတို့မှာ တစ်ကောင်လျှင် ကြာရွက်တစ်ခု စီပိုင်ဆိုင်ကြသည်။ အဲဒီဖားလေး နှစ်ကောင်သည် နေ့စဉ်ကိုယ့်ကြာရွက်ပေါ် ကိုယ်တက်ပြီး သီချင်းဆိုကြသည်။

တစ်နေ့တော့ ဖားနှစ်ကောင် သီးချင်းဆိုရာက တစ်ကောင်နှင့်တစ်ကောင် နားညဉ်းသည်ဟု ဆိုကာ စကားများကြသည်။ ဖားနှစ်ကောင်၏ အချင်းပွားမှုမှာ ပိုကြီးသည်ထက် ကြီးလာသည်။ စကားများကြရာက တစ်ကောင်နှင့် တစ်ကောင် ထသတ်တော့ မည့်အခြေအနေထိ တင်းမာလာသည်။

စကားများရင်က ဖားတစ်ကောင်က မပြောမဆိုနှင့် ရေထဲသို့ ငုပ်သွားသည်။ ပြန်တက်လာတော့ လက်ထဲမှာ ခဲတစ်လုံးပါလာပြီး ယင်းခဲကို သူ၏ကြာရွက်ပေါ်တွင် တင်ထားလိုက်သည်။ ဒီတော့ နောက်ဖားတစ် ကောင်ကလည်း ရေထဲသို့ ငုပ်သွားပြန်သည်။ ပြန်တက်လာတော့ ပထမဖားလိုပဲ လက်ထဲမှာ ခဲတစ်လုံးယူလာပြီး သူ၏ကြာရွက်ပေါ်မှာ တင်ထားလိုက်သည်။

ပထမဖားက နောက်တစ် ကြိမ်ရေထဲသို့ ငုတ်သွားပြန်သည်။ ပြန်တက်လာတော့ ပထအကြိမ်တုန်းကလို နောက်ထပ် ခဲတစ်လုံး ပါလာပြီး သူ့၏ကြာဖက် ပေါ်တွင်တင်ထားလိုက်သည်။ ဒီတော့ ပထမဖား ဆီမှာခဲနှစ်လုံး ဒုတိယဖားက ခဲတစ်လုံးဖြစ်နေသည်။ ဒုတိယဖားကလည်း နောက်တစ်ကြိမ် ထပ်ငုပ်ပြန်သည်။ ပြန်တက်လာ တော့ ခဲနှစ်လုံးယူလာပြီး သူကြာရွက်ပေါ် တင်ထားလိုက်သည်။

ပထဖားကလည်း ပြန်ငုတ်ပြီး ခဲသုံးလုံးထပ်တင်သည်။ ဒုတိယဖားက နောက်ထပ် လေးလုံးထပ်တင်သည်။ ဒီလိုနဲ့ အပြိုင်အဆိုင် ခဲတွေ တင်လာလိုက်ကြတာ ကြာရွက်များပေါ်တွင် ခဲများပြည့်သွားတော့သည်။ သိပ်မကြာလိုက်ပါ ကြာရွက်နှစ်ခုလုံး ခဲဝိတ်ကို မခိုင်၍ ရေထဲနှစ်မြုတ်သွားသည်။ ဖားနှစ်ကောင်လဲ ဘုံပျောက်သွားတော့သည်။

ဒါကပုံ ပြင်မဟုတ်ပါဘူး နိုင်ငံတကာ ရှော့ရှော့ဖလင်ခေါ် ကာတွန်းရုပ်ရှင် ပြိုင်ပွဲမှာ ဆုရသွားတဲ့ ရုရှ ကားတွန်းဆရာရဲ့လက်ရာလေးပါ။ သူက ယနေ့မျက်မောက်ခေတ်ကို ဖားပုံပြင် ဥပမာလေးပေးပြီး သရော်ထားတာပါ။

ယခုမျက်မှေက် ခေတ်မှာ နိုင်ငံတစ်နိုင်ငံနဲ့ တစ်နိုင်ငံ သူထက်ငါသာအောင် လက်နက်တွေ အပြိုင်အဆိုင် တီထွင်ထုတ်လုပ်နေကြပါတယ်။ ကိုယ့်နိုင်ငံက လက်နက်က သူ့နိုင်ငံက လက်နက်ထက် မသာရင်တောင် အောက်ကျလို့ မဖြစ်ပါဘူး။ ဒါကြောင့် ခောတ်မမှီတော့တဲ့ လက်နက်တွေကို ဖျက်သိမ်းလိုက်။ လက်နက်အသစ်တွေ ထုတ်လုပ်လိုက်နဲ့ အပြိုင်အဆိုင် တပ်ဆင်နေကြပါတယ်။

လက်နက်တွေ တပ်ဆင်ထုတ်လုပ်တယ်တယ် ဆိုတဲ့နေရာမှာ စရိတ်စက များစွာကြီးမားပါတယ်။ သုသေသနလုပ်ရတယ်။ လိုအပ်ရင် နည်းပညာကို ဈေးကြီးပေးပြီး ၀ယ်ရတယ်။ မြောက်ကိုးရီးယားဆိုရင် နယူးကလီးယား လက်နက်လုပ်တာ နိုင်ငံသားတွေ ဆင်းရဲကုန်ပါတယ်။ အမေရိကန်ဆိုရင် လက်နက်သုသေသန စရိတ်က တစ်နှစ်ကို ဘီလီယံ ငါးဆယ်ကျော် ရှိပါတယ်တဲ့။ အခုအီရန်ကလည်း နယူးကင်္လီးယား လက်နက်ပိုင်ဆိုင်ရေး လစဉ် ရုရှကို သန်း ၂၅၀ ပေးပြီး ကြိုးပမ်းနေပြန်ပါပြီ။

အန္ဒိယကလည်း ကီလိုတန် သုံးရာရှိတဲ့ နယူးကလီးယား ထိပ်ဖူးကို သယ်ဆေင်ပြီး မိုင်ပေါင်း ၁၉၀၀ အကွာကို ပစ်ခတ်နိုင်မဲ့ Agni III ဒုံးကျည်ကို စမ်းသပ်နေပါပြီ။ တရုပ်ကလည်း နိုင်ငံပိုင် မိုးလေ၀သ ဂြိုလ်တုဟောင်းကို ဒီတိုင်းမဖျက်ပဲ ဒုံးကျည်နဲ့ လှမ်းပစ်ချပြီး ငါတို့မှာ ဂြိုလ်တုတွေကို မှန်အောင်ပစ်ချနိုင်တဲ့ ခဲလုံးတွေရှိတယ်ဆိုတာကို ကြာရွက်ပေါ်မှာ တင်ပြီးကြွားထားပါတယ်။

ဒီတိုင်းတာ စစ်လက်နက်တွေ အပြိုင်အဆိုင် တပ်ဆင်နေကြဦး မယ်ဆိုရင် ရုရှ ကာတွန်းဆရာရဲ့ ဖားပုံပြင်လို ကမ္ဘာကြီလည်း မလွဲမသွေ နှစ်မြုတ်သွားမှာပါ။

No comments:

There was an error in this gadget