Art is My Life: April 2010

Tuesday, April 20, 2010

မြွေနဲ့ဖားနဲ့ဝေးတဲ့မြေ



ဖားကိုမြွေမြိုတာကို သင်မြင်ဖူးပါသလား။ ထိုအခါ သင်ဘာလုပ်သလဲ........

ရန်ကုန်မှာနေသူ တော်တော်များများကတော့ ဖားကိုမြွှေမြိုသည့် မြင်ကွင်းကို မြင်ဖူးသူ နည်းလိမ့်မည်ဟု ထင်ပါသည်။ ကျွန်တော်တို့ နယ်မှာတော့ မြွေလည်းပေါ ဖားလည်း ပေါသည့်အတွက်ကြောင့် ဖားအားမြွေကမြိုတာကို မကြာခဏဆိုသလို မြင်ဖူးပါသည်။

ဖားသည် သာမန်အချိန်တွင် အုံးအွမ်အုံးအွမ်ဟု အော်သော်လည်း အန္ဒရာယ်ကျရောက်သည့် အခါတွင် အုံးအွမ် အုံးအွမ်ဟု မအော်တော့ပါ။ ပုရစ်အော်သံနှင့် ခပ်ဆင်ဆင်တူသော အသံဖြင့်အော်ပါသည်။ သို့ရာတွင် ပရစ်အော်သံက ရှည်ပြီး ဖားအော်သံက တို၍ ပြတ်တောင်း ပြတ်တောင်းထွက်ပါသည်။

ကျွန်တော်ငယ်ငယ်ကတော့ ဖားကို မြွေမြိုသည့်အသံကြားပြီ ဆိုသည့်နှင့် ခဲလုံးသို့မဟုတ် ဒုတ်ကို ကိုင်ပြီး အသံကြားရာတွင် လိုက်ရှာပါသည်။ တွေ့ပြီဆိုသည့်နှင့် မြွှေကိုခဲနှင့်ပစ် ဒုတ်နဲ့ရိုက်ပြီး ဖားအသက်ကို ကယ်လေ့ရှိသည်။ (မြွေ၏ သဘောသ၀သည် အစာကို ချက်ခြင်းမြိုချနိုင်စွမ်းမရှိပါ။ သူ့အပေါ်ကို အန္ဒရာယ်တစ်စုံ တစ်ရာ ကျရောက်လာသည့်နှင့် ပါးစပ်ထဲက အစာကို ချက်ခြင်းထွေးထုတ်ပြီး အသက်လွှတ်ပြေးတတ်သည့် သဘာဝရှိသည်။ ကျွန်တော့် အတွေ့အကြုံအရ ဖားသည် မြွေပါးစပ်မှ လွှတ်သည်နှင့် ချက်ခြင်း ပြေးနိုင်ပါသည်။ နောက်မှ သေသည်ရှင်သည်တော့ မပြောတတ်ပါ)

ထိုအရွယ်က ငယ်သေးလို့လားမသိ မြွေကိုလည်း တော်တော်အမြင်ကတ်သည်။ လမ်းမှာ သူ့ဖာသာသူ ဖြတ်သွားတာ တွေ့လျှင်ပင် လိုက်ပြီးရိုက်သတ်လေ့ရှိသည်။ ထို့ကြောင့် ဖားတစ်ကောင်အား မြိုနေသည်ကို မြင်၍ ဖားအား ကယ်နိုင်လိုက်လျှင် အသက်တစ်ချောင်းကို ကယ်နိုင်ခဲ့ပြီးဆိုပြီး ကိုယ့်ကိုယ် ကျေနပ်ပိတိဖြစ်လေ့ရှိသည်။

ကျွန်တော်မြို့အလည်မှာ ပန်းချီဆိုင်းဘုတ်တွေရေးသော ပန်ချီဆိုင်တစ်ဆိုင်ရှိသည်။ တစ်နေ့ ကျွန်တော် ထိုပန်းချီဆိုင်အနီးက ရေမြောင်းလေး တစ်ခုမှာ လူတွေ ၀ိုင်အုံနေကြသည်ကို တွေ့ရသည်။ စပ်စုသူပီပီ ကျွန်တော်လည်း ထိုလူအုပ်ထဲသို့ တို့ဝှေ့ကြည့်လိုက်မိသည်။ တို့ဝှေ့ပြီး ကျွန်တော်မြင်လိုက်ရတာက လက်မအရွယ်လောက်ရှိသော မြွှေသေးသေးလေး တစ်ကောင်က သူ့ထက်အဆအများကြီး ကြီးသော ဖားတစ်ကောင်ကို ကိုက်ပြီး ကုန်းပေါ်ကို ဆွဲတင်ဖို့ ကြိုးစားနေသည်။ ကျွန်တော်က မြွေကို မြင်လိုက်သည်နှင့် လက်က ယားနေပြီ ထို့ကြောင့် ခဲတစ်လုံးကို ကောက်ပြီး ပစ်ဖို့လုပ်တော့ ပန်းချီဆရာက ကျွန်တော့်ကို တားသည်။

“မလုပ်နဲ့ ဒါသဘာဝပဲ သူ့အစာကို သူ့ဖာသာသူရှာစားတာ”

ကျွန်တော်အဲဒီတုန်းက ခုနှစ်တန်းလောက်ပဲ ရှိသေးအတွက် ကလေးရွယ်ဖြစ်တာကြောင့် ပန်းချီဆရာကို ကြောက်၍သာ အသာလေးနေရသည်။ ကျွန်တော့်လက်ကတော့ မြွေကိုခဲနှင့် ပစ်ချင်နေသည်။ သို့ရာတွင် မတတ်သာ၍ အများနည်းတူ ဆက်ကြည့်နေလိုက်သည်။

မြွေလေးက ပိန်းရိုးတွေကို အားပြုပြီး ဆွဲတင်လိုက် ဖား ရုန်းလိုက်လျှင် အားချင်းမမျှသည့်အတွက် ပြန်ကျသွားလိုက်နှင့် ဖြစ်နေသည်။ နောက်တော့ မြွေက သူ့အမြီးကို ပိန်းရိုးတွေပေါ်မှာ ကြိုးနှင့်ချီသလို မြဲအောင် ချီထားပြီး တဖြည်းဖြည်းချင်း ဆွဲတင်တော့ ဖားက ရေထဲကနေ ကုန်းပေါ်ကိုပါ လာသည်။ မြွေက ကုန်းပေါ်ရောက်အောင် ဖားကို ဆွဲတင်သွားနိုင်ပြီလည်းဆိုရော ပန်ချီဆရာလည်း ထွက်သွားသည်။ ပန်းချီဆရာ ထွက်သွားနှင့် ကျွန်တော် မြွေကို ခဲနှင့်စပစ်ပါတော့သည်။ ကျွန်တော်ခဲနှင့် ပစ်သည့်အတွက် မြွေက ဖားကို ပစ်ထားပြီး ကိုယ်လွှတ်ရုန်းပြေးသွားသည်။ ကုန်းပေါ်တွင် ခုန်ဆွခုန်ဆွနဲ့ ကျန်ရစ်ခဲ့သော ဖားကို တုတ်နှင့် ကလော်ပြီး မြောင်းထဲ ပြန်ချထားခဲ့လိုက်သည်။

* * * * *

တစ်လောက ပြသနာ တော်တော်တက်လိုက်သည်။ သို့ပေမယ့် တက်သည့်ပြသနာက ကိုယ့်ပြသနာမဟုတ်။ သူငယ်ချင်း လင်မယားနှစ်ယောက်ကြားက ပြသနာ။ ယေကျာင်္းဖြစ်သူက ရှုပ်သည်။ မိန်းဖြစ်သူက ယေကျာင်္းရှုပ်တာကို လိုက်စုံစမ်းနေသည်။ အမှန်တိုင်းပြောရရင်တော့ လင်ရယ်မယားရယ်လို့ ဖြစ်လာပြီးတော့ မကွဲစေချင်ပါဘူး။ ဒါကြောင့် သူငယ်ချင်းဖြစ်သူကို နည်းနည်းဆင်ချင်ဖို့ သတိပေးသည်။ သူက သတိပေးလဲ ပေးငပေး သူ့အကျင့်တိုင်း နေမြဲတိုင်းနေသည်။

ပြသနာက တဖြည်းဖြည်းကြီးလာတာအမျှ ယေကျာင်္းဘက်ကပဲ ပါရမလိုလို မိန်းဘက်ပဲ ပါရမလိုလို။ ယေကျာင်္းဘက်က ပါပြန်ရင်လဲ အိမ်ထောင်မှုဖောက်ပြန်တာကြိးကို အားပေးရာရောက်မည်။ အားမပေးပဲ သူလုပ်နေတာကိုရပ်သွားအောင် ဇွတ်အတင်း လိုက်ဖျက်ရအောင်ကလဲ မဟုတ်တတ်။ ကြာလာတော့ မိန်းမဖြစ်သူက သူယေကျာင်္း ရှုပ်တာ ကျွန်တော်တို့ မြောက်ပေးလို့ပဲ ဖြစ်တာလိုလို ဘာလိုလို ထင်လာသည်။ ယေကျာင်္းကလဲ သူရှုပ်တာ မိန်းမသိတယ်ဆိုတော့ ကျွန်တော်တို့ပဲ သတင်းပေးလို့ သိတာလိုလို ဘာလိုလို ထင်လာသည်။

* * * * *


အခုနေ ပြန်စဉ်းစားကြည့်တော့ မြွေကနေ ဖားကို မြိုနေတာတွေ့ရင် ကယ်သင့်လား မကယ်သင့်လားဆိုတာ စဉ်းစားစရာဖြစ်လာသည်။ အင်အားကြီးသူက နှင့် အင်အားနည်းသူ ဖြစ်နေသည့်အတွက် ကယ်သင့်လား။ ပန်းချီဆရာ ပြောသလိုပဲ ဒါသဘာဝပဲ သူ့အစာကို သူ့ဖာသာရှာစားဆိုပြီး ကြည့်နေသင့်လား။ ဘယ်ဟာမှန်လဲ ကျွန်တော်သေသေချာချာ မစဉ်းစားတတ်။

ဘာပဲဖြစ်ဖြစ် ရန်ကုန်ရောက်လာပြီးကတည်းက ဖားကမြွေကိုမြိုတာ တစ်ခါမှမတွေ့ရတော့ပေ။ အဘယ့်ကြောင့်ဆိုသော် ကျွန်တော်နေတဲ့နေရာက မြွေတွေဖားတွေနဲ့ဝေးနေလို့ ဖြစ်ပါလိမ့်မည်။


Read More...

Thursday, April 01, 2010

ဓာတ်ပုံကောင်းတစ်ပုံရဲ့ လျှို့ဝှက်ချက်


ရှင်းလင်းပြတ်သားသော Back ground ကို ရွေးချယ်ပါ

ဓာတ်ပုံကောင်းတစ်ပုံ ဖြစ်ဖို့ ဆိုတဲ့နေရာမှာ သူရဲ့ အဓိက အားသာချက်တွေ အများကြီး ရှိတဲ့ အနက်က ဒီနေ့ ပြောမှာကတော့ ဓာတ်ပုံရဲ့ Back ground ရဲ့ အရေးပါမှုကို ပြောမှာ ဖြစ်ပါတယ်။

အရင်တုန်းက ဓာတ်ပုံတစ်ပုံမှာ ရှင်းလင်းပြတ်သားတဲ့ Back ground ရှိရမယ်လို့ ကျွန်တော့် Editor က ပြောတော့ ကျွန်တော်လက်မခံနိုင်ဘူး ဘာဖြစ်လို့လဲဆိုတော့ အရှေ့က အရာဝတ္ထုက လှနေရင်လဲ ဓာတ်ပုံကောင်း တစ်ပုံ ဖြစ်လာနိုင်တာပဲလေ။ ကျွန်တော်အဲလိုပဲ တွေးပါတယ်။ ဒါပေမယ့် တကမ်း ရိုက်လာတာနဲ့အမျှ သူပြောတဲ့အတိုင်း သေချာ ပြန်စဉ်းစားကြည့်တော့ ဟုတ်ပါတယ် အကောင်းဆုံးဆိုတဲ့ ဓာတ်ပုံတွေရဲ့ ရာနှုန်းပြည့်နီးပါးဟာ ရှင်းလင်းပြတ်သားတဲ့ Back ground ရှိနေတာကို တွေ့ရမှာဖြစ်ပါတယ်။
ဥပမာ အနေနဲ့ ဒီပုံလေးတွေကို ကြည့်ကြည့်ရအောင်



ရှင်းလင်းပြတ်သားတဲ့ Back ground ရှိတဲ့ပုံ



ရှင်းလင်းပြတ်သားတဲ့ Back ground မရှိတဲ့ပုံ

ပထမပုံ မှာကတော့ နောက်ခံ Back ground က ရှင်းလင်းပြတ်သားတဲ့အပြင် အရှေ့ဆုံးက ကိုရင်လေးတစ်ပါးတည်းကိုပဲ Focus လုပ်ထားတာ ဖြစ်ပါတယ်။ ဒါကြောင့် ဒီပုံကိုကြည့်လိုက်တာနဲ့ ပြချင်တဲ့ Main Subject ကိုရင်လေးကို ထင်ထင်ရှားရှား မြင်တွေ့နိုင်တာဖြစ်ပါတယ်။

ဒုတိယပုံမှာဆိုရင်လဲ ကိုရင်လေးတစ်ပါးတည်းကို Focus လုပ်ထားတာ ဖြစ်ပေမယ့် နောက်ခံမှာ ပါနေတဲ့ ဥပဇဉ်းက မျက်နှာတစ်ခုလုံး အပြည့်မပါပဲ ပြတ်နေတယ်။ ပြီးတော့ အနောက်မှာ ကားတစ်စီးရှိရှိနေတယ်။ ကားရဲ့ရောင် နောက်က ဥပဇဉ်းရဲ့အရောင်ဟာ အရှေ့က Focus လုပ်ပြထားတဲ့ ကိုရင်လေးနဲ့ ရောနေတဲ့အတွက် ပြချင်တဲ့ Main Subject က ရုပ်လုံးကြွမလာတော့ပါဘူး။ တကယ်လို့များသာ နောက်ခံဟာ ရှင်းလင်းပြတ်သားနေမယ်ဆိုရင် ဒီထက်ကောင်းတဲ့ ပုံလေးတစ်ပုံ ဖြစ်လာမှာပါ။

ဒီနေရာမှာ တစ်ခုမေးစရာ ရှိပါတယ်။ အဲဒါဆိုရင် နောက်ခံရှင်းလင်းပြတ်သားမှု မရှိတဲ့အခါမှာ ကျွန်တ်ာတို့ ဘာလုပ်ကြမလဲ။ ကျွန်တော်နောက်ထပ် ပုံလေး နှစ်ပုံကို ထပ်ပြပါမယ်။



ဒီပုံလေးကတော့ ပဲခူးတိုင်း သနပ်ပင်မြို့နယ် မင်းရွာသွားတုန်းက ရိုက်ခဲ့တာပါ။ ကျွန်တော်ပထဆုံးတွေ့ လိုက်ရတဲ့ အချိန်မှာ အခုလို အနေထားလေးပါ။ ကလေးတစ်ယောက်က ကျွဲပေါ်မှာ တက်စီးပြီး ကလေးတစ်ယောက်က ကျွဲကို ဆွဲသွားတယ်။ သာမှန်အားဖြင့် ပြောမယ်ဆိုရင် ရိုက်လို့လှမဲ့ ပုံလေးတစ်ပုံပါ။ ဒါပေမယ့် ခက်တာက အနောက်မှာ နွားတစ်ကောင်ကလဲ ရှိနေတယ် ပြီးတော့ နောက်ခံအုန်းပင်တွေရဲ့ အရောင်နဲ့ အရှေ့က အရောင်တွေနဲ့ သိပ်ပြီးကွဲပြားမှု မရှိဘူး။ အဲဒါကြောင့် ရိုက်မယ်ဆိုရင် ကိုယ်ပြချင်တဲ့ ကျွဲနဲ့ကလေးတွေရဲ့ပုံက ကြွတက်လာမှာမဟုတ်ဘူး။

အဲဒါကြောင့် ကျွန်တော် ကျွဲရဲ့ ဘယ်ဘက် အခြမ်းကနေ ရိုက်ရာကနေ ညာဘက်ခြမ်းကို ကူးလိုက်တယ်။ ညာဘက် အခြမ်းကနေ ကြည့်ရင် နောက်ခံ သစ်ပင်တွေဟာ ဘယ်ဘက်အခြမ်းက ကြည့်တာလောက် မရှုပ်ပေမယ့် နေလုံးကြီးရှိနေတော့ အလင်းရောင်နဲ့ ထိပ်တိုက်ကြီး ဖြစ်နေတယ်။ အဲဒါကြောင့် F ကို 22 မှာထားပြီးတော့ ရိုက်လိုက်တယ်။



အဲဒီအခါမှာ ဒီပုံလေးရလာတယ်။ ဒီပုံဟာဆိုရင် အရမ်းအကောင်းကြီး မဟုတ်ရင်တောင် ပထမပုံထက်စာရင်တော့ ကိုယ်ပြချင်တဲ့ အကြောင်းရာလေးက ကြွတက်လာတယ်။ F ကို 22 မှာ ထားတဲ့အတွက် နေက ကြယ်လို ဖြစ်သွားတယ် အရှေ့က ရှိတဲ့အရာဝတ္ထုကလည်း မဲသွားတယ်။ ဒီပုံက အဖြူအမည်းပုံမှဟုတ်ပါဘူး Exposure အမှန်က နေရောင်ပေါ်မှာ ရှိနေတဲ့အတွက် ကျန်တဲ့ အရာဝတ္ထုတွေကမည်းသွားတာပါ။

ဒီနေ့ ပြောချင်တဲ့ ဓာတ်ပုံကောင်းတစ်ပုံရဲ့ လျှို့ဝှက်ချက်ကတော့ ဒီလောက်ပါပဲ နောက်ကြုံတဲ့အခါမှ နောက်ထပ် လျှို့ဝှက်ချက်ကို ထပ်ပြောပါမယ်။

Read More...